Икки юнон-рум курашчимизда бронза, бугун яна медаллар кутяпмиз

Ўз тарихида 24-маротаба ташкил этилаётган мусобақанинг иккинчи кунги баҳсларида икки юнон-рум курашчимиз бронза медалини қўлга киритди. -55 кг вазн тоифасидаги курашчимиз Илҳом Баҳромов бронза медали учун кечган беллашувда украиналик Вячеслав Байрактарни 8:0 ҳисобида доғда қолдирди. Юнон-рум курашчиларимизга иккинчи бронза медалини Токио Олимпиадаси лицензианти Жалгасбай Бердимуратов тақдим этди. У беларуслик Ярослав Курсдан 8:0 ҳисобида устун келди. 

Бугун ўтказиладиган учинчи кунги финал босқич баҳсларида яна бир неча юнон-рум курашчимиз мусобақанинг бронза медали учун гиламга чиқади. Ярим финалда эронлик рақиби Али Ризо Нежатига 6:9 ҳисобида ютқазиб қўйган Ислом Баҳромов бугун бронза медали учун баҳсга киришади. Унинг рақиби ўтиш беллашувидаги Украина ва Арманистон курашчилари баҳсидан сўнг маълум бўлади.

-67 кг вазн тоифасида юртимиз шарафини ҳимоя қилаётган уч курашчимизда мусобақанинг бронза медалларини қўлга киритиш имконияти юзага келган. Арам Варданян ва Маҳмуд Бахшуллоев бронза медали учун кечадиган беллашувдаги рақибларини кутишяпти. Арамнинг рақиби айнан Мирзобек Раҳматов бўлиши мумкин. Бунинг учун у ўтиш бахсида украиналик Мирошникни мағлуб этиши лозим.  

130 кг вазндаги полвонимиз, Осиё ўйинлари ғолиби Мўминжон Абдуллаев ҳам бугун бронза медали учун гиламга чиқади. Унинг рақиби Болгария ёки грузиялик курашчи бўлади. Токио Олимпиадаси йўлланмасини қўлга киритиб улгурган Рустам Ассакалов бронза медали йўлидаги ўтиш баҳсида иштирок этади.