Икки юртдошимиз хоккей бўйича тренер-ўқитувчи дипломини қўлга киритди

Хусусан, жорий йил 15 март куни пойтахтимизда барпо этилган кўп тармоқли “Ҳумо Арена” муз саройи фойдаланишга топширилди, Самарқанд шаҳрида ҳам муз саройи қурилиши бошлаб юборилди, бир қатор вилоятларда муз саройларини қуриш режалаштирилмоқда.

Жисмоний тарбия ва спорт вазирлиги томонидан мазкур иншоотлардан янада самарали фойдаланиш, ёшларимизни қишки спорт турлари билан муносиб шуғулланишлари учун илғор хорижий олий таълим муассасалари билан ҳамкорликда малакали тренерлар тайёрлаш ишлари бошлаб юборилди.

Жумладан, ўтган йилнинг октябрь ойида Россиянинг П.Ф.Лесгафт номидаги Санкт-Петербург миллий давлат жисмоний тарбия, спорт ва саломатлик университети раҳбарияти билан бир неча маротаба музокаралар ўтказилиб, ҳамкорликда тренерлар тайёрлаш бўйича келишувга эришилганди.

Икки томонлама ҳамкорлик шартномасига асосан Ўзбекистон давлат жисмоний тарбия ва спорт университети ўқитувчилари Давлетмуродов Султон ва Каримов Абдуҳамид П.Ф.Лесгафт номидаги Санкт-Петербург миллий давлат жисмоний тарбия, спорт ва саломатлик университетига ўқишга юборилди.

Университетнинг Тренерлар тайёрлаш олий мактаби дастурига асосан “Юқори малакали хоккейчиларни тайёрлаш назарияси ва методикаси” профессионал қайта тайёрлов курсини муваффақиятли тугаллаган юртдошларимизга хоккей бўйича тренер-ўқитувчи дипломи топширилди. Бу ҳақда Жисмоний тарбия ва спорт вазирлиги расмий сайти маълум қилди.

Ушбу мутахассислар Ўзбекистон давлат жисмоний тарбия ва спорт университетида очилиши режалаштирилган хоккей йўналишига қабул қилинадиган талаба-ёшларни ўқитиш методлари, фан ўқув дастурлари, ўқув режаларини ишлаб чиқиш бўйича фаолият олиб боради.

Эслатиб ўтамиз, Беларусь давлат жисмоний тарбия университети ҳамда Россия Федерациясининг П.Ф.Лесгафт номидаги Санкт-Петербург миллий давлат жисмоний тарбия, спорт ва саломатлик университетининг Ўзбекистон давлат жисмоний тарбия ва спорт университети таркибида Ўзбек-Беларусь ҳамда Ўзбек-Рус қўшма факультетларини ташкил этиш тўғрисидаги Ҳукумат қарори лойиҳаси эълон қилинган эди.