Индор хоккей бўйича Ўзбекистон чемпионати ғолиблари аниқ бўлди

“Баркамол авлод” стадионида Ўзбекистон Республикаси Жисмоний тарбия ва спорт вазирлиги томонидан ўтказилган мамлакат чемпионатида олтитадан эркаклар ва аёллар жамоалари иштирок этди.

Эркаклар ўртасидаги мусобақаларда Андижон, Тошкент, Наманган, Хоразм, Фарғона вилоятлари терма ҳамда Андижон ихтисослаштирилган олимпия захиралари мактаб-интернати жамоалари ғолиблик учун баҳс олиб борди.

Якуний натижаларга кўра, Андижон вилояти терма жамоаси биринчи ўринни қўлга киритди. Иккинчи ўрин Тошкент вилояти, учинчи ўрин Наманган вилояти терма жамоаларига насиб этди.

Аёллар жамоалари ўртасида эса Андижон, Бухоро, Самарқанд, Фарғона, Наманган ва Хоразм вилоятлари терма жамоалари куч синашди. Якунда Бухоро вилояти терма жамоаси барча рақибларидан устун келиб, биринчи ўринга сазовор бўлди.

Андижон вилояти жамоасига иккинчи, наманганлик хоккейчи қизларга учинчи ўрин насиб этди. Чемпионатнинг ғолиб ва совриндорлари ташкилотчилар томонидан тегишли медаллар, эсдалик совғалари билан тақдирланди.