Исмоилов ва Саидкаримов Минскда кортга чиқишди

Соврин жамғармаси 15 000 АҚШ долларини ташкил қилувчи ушбу мусобақанинг асосий тўрида Темур Исмоилов, Ҳумоюн Султонов ва Саидаъло Саидкаримовнинг иштирок этиши ҳақида хабар берган эдик.

Улардан икки нафари биринчи даврадаёқ ўз иштирокларини якунлашди. Турнирнинг 5-ракеткаси бўлган Исмоилов қозоғистонлик Денис Евсеевга қарши баҳсни якунига етказа олмади.

Биринчи сетни 1:6 ҳисобида бой берган Исмоилов иккинчи сетнинг иккинчи геймидан сўнг баҳсни давом эттира олмаслигини маълум қилди. Саралаш баҳслари орқали асосий тўрга етиб келган Саидаъло эса турнирнинг 4-ракеткаси Томас Папикка 2:6, 5:7 ҳисобида ютқазиб қўйди.

Эслатиб ўтамиз, дунё рейтингида 1024-ўринни эгаллаб турган ҳамюртимиз Ҳумоюн Султонов турнирда иккинчи рақам остида таснифланган, рейтингда ўзидан 680 поғона юқорида турган беларуслик Яраслав Шилани мағлубиятга учратиб, катта шов-шув кўтарган эди.