18 апр 20:51
Янгиликлар

Бокс/ММА

Исроил Мадримовга уй совға қилинди

Тошкент вилояти Олмалиқ шаҳрида вилоят жисмоний тарбия ва спорт бошқармаси ташаббуси билан халқаро ареналарда Ватанимиз шарафини муносиб ҳимоя қилиб келаётган боксчиларимиз билан ёшлар учрашуви ташкил этилди.

Тадбирда -75 кг вазн тоифасидаги истеъдодли боксчимиз, Осиё чемпиони, профессионал боксда WBA Intercontinental камари соҳиби Исроил Мадримов ҳамда Осиё чемпиони, WBА ва IBF чемпионлик камарлари соҳиби Муроджон Аҳмадалиевлар иштирок этди.

Таниқли боксчиларимизнинг Олмалиқ шаҳрига ташрифи спорт мухлисларини ниҳоятда хурсанд қилди. Хусусан, шаҳар ҳокимлигининг фаоллар залида спорт ихлосмандлари бўлган ёшлар билан ўтказилган ушбу учрашув жаҳон чемпионларини ҳам хурсанд қилди. Унда ёшлар ўзларини қизиқтирган саволлар билан чемпионларга мурожаат қилишди ва атрофлича жавоб олишди.

Тадбир якунида Олмалиқ шаҳар ҳокимлиги томонидан Тошкент вилояти вакили Исроил Мадримовга шаҳарда янги қурилаётган кўп қаватли уйлардан 3 хонали уй совға қилинди ва тегишли сертификат тақдим этилди.

Шубҳа йўқки, бу каби тадбирлар ёш авлод қалбида спортга меҳр уйғотади ва улар орасидан эртага Осиё ва Жаҳон чемпионлари, Олимпия ўйинлари ғолиблари ҳам етишиб чиқади.