Истомин Delray Beach ATP 250 турнири асосий тўрига чиқди

Кеча оқшом мусобақанинг саралаш баҳслари якунланиб, асосий тўрга йўлланма олган барча теннисчилар номи маълум бўлди. Улар орасида ҳамюртимиз Денис Истомин ҳам бор. 

Мамлакатимизнинг биринчи ракеткаси "Delray Beach ATP 250" турнирининг саралаш босқичи ярим финалида рейтингда ўзидан 114 поғона юқорида бораётган авcтриялик Юрий Родионовни 6:4, 6:2 ҳисобида мағлуб этганди.

Кеча теннисчимиз саралашнинг финал учрашувида эквадорлик Эмилио Гомесга қарши баҳс олиб борди ва 7/6(7), 6/2 ҳисобида зафар қучди. Гомес ATP рейтингида 149, Истомин эса 267-ўринни эгаллаб турибди. 

Денис Истоминни асосий тўрнинг илк даврасида жиддий рақиб кутиб турибди. Вакилимиз дунёнинг 118-ракеткаси, америкалик Сэм Куэррига қарши кортга чиқади. Ушбу баҳс Тошкент вақти билан эртага соат 20:00да бошланиши режалаштирилган. Теннисчилар ўзаро 4 маротаба тўқнаш келишган. Ҳозирча ҳисоб - 2:2!