Истомин ва Султонов бугун нега кортга чиқмади? Дўстов саволни очиқлади

Дастлабки кунги қарама-қаршиликдан сўнг терма жамоалар ўртасидаги ҳисоб ҳозирча - 1:1. 

Бугун кўпчилик кортда Денис Истомин ва Ҳумоюн Султоновни кўришни хоҳлаганди. Аммо, улар бугунги ўйинларда иштирок этишмади. Бунинг сабабини билиш мақсадида olamsport.com сайти мухбири терма жамоа сардори Фаррух Дўстов билан суҳбатлашди ва бу ҳолатга ойдинлик киритди. 

- Бугун нима сабабдан Денис Истомин ва Ҳумоюн Султонов таркибга киритилмади? 

- Уларнинг ҳар иккисида ҳам жароҳат бор. Шу сабабли бугунги ўйинда улар иштирок эта олишмади. Истомин машғулот ўтказаётганда ўнг оёғидан жароҳат олди. Ҳумоюн эса тиззасидан жароҳат олганди. Бугунги ўйин учун уларни тайёрлашга ҳаракат қилдик, аммо бунинг уддасидан чиқа олмадик. 

- Эртага таркибда ўзгариш бўлиши мумкинми? 

 - Кўрамиз. Терма жамоадагилар билан маслаҳатлашамиз ва вазиятдан келиб чиққан ҳолда қарор қабул қиламиз. Балки Ҳумоюн Султонов эртага ўйнаб қолиши ҳам мумкин. Агар таркибда ўзгариш бўлса, Истоминга қараганда Ҳумоюннинг кортга чиқиш эҳтимоли юқорироқ. 

- Санжар Файзиев икки бор medical time'га мурожаат қилди. Унда жароҳат йўқми? 

- Ҳаммаси жойида. Қўлида озгина оғриқ сезгани сабабли у medical time'га мурожаат қилди. Бу эртанги ўйинга ҳеч қандай таъсир ўтказмайди. Шифокорларимиз у билан ишлашади. 

Хуршида Абдикулова суҳбатлашди