Истоминнинг финалдаги рақиби дунёнинг 158-ракеткаси!

Хабар берганимиздек, кеча мамлакатимизнинг биринчи ракеткаси саралашнинг илк босқич баҳсида ғалабага эришганди. Истомин саралашнинг биринчи рақамли теннисчиси франциялик Жиль Симондан 2 соату 38 дақиқа давом этган учрашувда 4:6, 7:6(9:7), 7:6(7:5) ҳисобида устун келганди.

Бугун Денис саралашнинг финал ўйинида германиялик Маттиас Бахингерга қарши кортга чиқади. Бу олмон теннисчиси кеча илк даврада дунёнинг 88-ракеткаси канадалик Васек Поспишилни 5:7, 7:6(7:3), 7:5 ҳисобида мағлуб этган эди. 

Истомин ва Бахингер шу кунгача ўзаро икки бор кортда тўқнаш келишган. Иккала учрашув ҳам 2011 йили ўтказилиб, теннисчилар биттадан ғалабага эришишганди. Истомин Бахингер баҳси бугун Тошкент вақти билан соат 17:30дан сўнг бошланади. Ғолиб теннисчи турнирнинг асосий тўрига йўл олади. 

Таққослаш учун, Истомин дунё рейтингида роппа-роса 100, Симон 55, Бахингер эса 158-ўринни эгаллаб турибди.