Жаҳон чемпионати. 1/4 финалга етиб келган ягона вакиламиз рингга чиқди

Ушбу мусобақада илк маротаба Ўзбекистон терма жамоаси тўлиқ таркибда иштирок этди. Улардан фақат бир нафаригина жаҳон чемпионатининг чорак финалига қадар етиб келди. 

+81 кг вазн тоифасида рингга кўтарилган Гўзал Исматова илк даврада венгриялик Адриен Жунашни иккинчи раундда техник нокаутга учратганди, Афсуски, бугун мураккаб кечган чорак финал жангида россиялик Кристина Ткачёвага 2:3 ҳисобида имкониятни бой бериб қўйди. 

Жазоир ва аргентиналик ҳакамлар бир хил 29:28 ҳисобида ғалабани Исматовага берган. Хитой (30:27), Миср (30:27) ва ирландиялик (29:28) ҳакамлар эса россиялик боксчининг ярим финалга чиқишини хоҳлашган. Агар ҳамюртимиз ярим финалга йўл олганида, камида жаҳон чемпионатининг бронза медалини қўлга киритарди. 

Эслатиб ўтамиз, Гуласал Султоналиева (-48 кг) кореялик Чо Ронг Бакка 0:5, Мафтунахон Мелиева (-69 кг) шотландиялик Меган Рейдга 0:5, Эъзозахон Мелиева (-75 кг) мозамбиклик Адосинда Граманга 2:3, Азиза Ёқубова (-51 кг) япониялик Цукими Намикига 2:3, Турсуной Раҳимова (-54 кг) Модестин Мунга Залияга 0:5, Рио Олимпиадаси иштирокчиси Ёдгорой Мирзаева (-57 кг) руминиялик Лакрамиоара Перижокка 0:5, Райҳона Қодиров (-60 кг) болгариялик Дениса Йорданова Елисеевага 2:3 ҳисобида мағлуб бўлди. 

Маълумот учун, ушбу жаҳон чемпионатида ҳамюртларимиздан Александр Ҳамидов ҳакамлик қиляпти. У шу кунгача йигирмадан зиёд жангларда ҳакамлик қилишга муваффақ бўлди.