Жаҳон чемпионати. Дзюдочиларимиз иштирокларини якунлашди, энди навбат жамовий баҳсларга!

Афсуски, бугунги баҳсларда иштирок этган Ўзбекистон ёшлар терма жамоасининг тўрт нафар аъзоси учун жаҳон чемпионати муддатидан аввал якунланди. 

-100 кг вазн тоифасида юртимиз шарафини ҳимоя қилган Акром Бўронов илк даврада венгриялик Жомбор Вегга, +100 кг вазндаги дзюдочимиз Шоҳрух Мамарасулов жазоирлик Абдулқодир Хичем Хачедга имкониятни бой берди. +100 кг вазндаги иккинчи полвонимиз Шоҳрух Бахтиёров франциялк Тиеман Диабини мағлуб этди, лекин иккинчи босқичда германиялик Эрик Абрамовга ютқазди. 

-78 кг вазн тоифасидаги вакиламиз Моҳинисахон Ҳусанова биринчи даврада АҚШ спортчиси Наталия Станоевичдан устун келди. Аммо, иккинчи босқичда австралиялик Абигейл Падучга ютқазиб, жаҳон чемпионати билан хайрлашди. 

Шу тариқа, жаҳон чемпионатидаги энг яхши натижамиз 5-ўрин бўлди. -66 кг вазн тоифасида юртимиз шарафини ҳимоя қилган Дилшодбек Йўлдошев кучли бешликка киришга муваффақ бўлди. У бронза медали учун кечган беллашувда бразилиялик Марселиньога ютқазиб қўйган эди. Энди дзюдочиларимиз жамоавий баҳсларда иштирок этишади.