“Жангоҳ”да кикбоксинг бўйича жанглар бўлиб ўтди

“Камолот” ёшлар ижтимоий ҳаракати ҳамда Ўзбекистон кикбоксинг федерацияси ҳамкорлигида ташкил этилган мусобақада республикамизнинг барча вилоятларидан келган 400 нафарга яқин спортчи иштирок этди.

Таъкидлаш жоизки, мазкур чемпионат жорий йилнинг 1-9 август кунлари Ҳиндистоннинг Нью-Дели шаҳрида ўтказиладиган Осиё чемпионатига ўзига хос тайёргарлик ва саралаш вазифасини ўтаб берди.

“Ўзбекистон чемпионати ҳар қачонгидан ҳам қизиқарли бўлиб ўтди. Медаллар учун кураш жуда кескин руҳда бўлди. Вилоятларда кикбоксинг янги босқичга чиқиб бораётгани яққол кўзга ташланди. Терма жамоага янги номзодларни ўзимиз учун аниқлаб олдик. Ўз вазн тоифаларида ғолиб чиққан спортчилар энди Ҳиндистонда ўтказиладиган Осиё чемпионатига тайёргарлик кўришади”, ‑ деди Ўзбекистон кикбоксинг федерацияси раиси Шерзод Турсунохунов.

Энди бевосита натижаларга тўхталадиган бўлсак, лоу-кик ва фул-контакт йўналишари бўйича ўтказилган баҳслар анча қизиқарли ва муросасиз кечди. Икки кунлик натижаларга кўра, жамоалар ўртасида Тошкент шаҳри, Қорақалпоғистон Республикаси ва Андижон вилояти жамолари юқори натижларни қайд этишди. Мусобақа якунида ғолиб ва совриндорлар ҳомий ва ташкилотчиларнинг эсдалик совғалари ва медаллари билан тақдирланди.