28 окт 09:47
Янгиликлар
Теннис
Жўрабек финалда биринчи ракеткага қарши кортга чиқади
Малайзия пойтахти Куала-Лумпур шаҳри мезбонлик қилаётган теннис бўйича соврин жамғармаси 15 000 АҚШ долларидан иборат турнир ўз якуни сари яқинлашмоқда.
Бизнинг вақт билан эртага тонгда “Фьючерс” туркумига кирувчи ушбу мусобақанинг яккалик баҳсларидаги ғолиби аниқланади. Кеча жуфтликда бош мукофотни қўлга киритган ҳамюртимиз Жўрабек Каримов олтин дубл қайд этишга уриниб кўради.
Бугун Каримов яккалик баҳсларининг ярим финал учрашувида турнирнинг еттинчи ракеткаси япониялик Кен Онишини 6:1, 6:3 ҳисобида мағлуб этганди.
Теннисчимизнинг финал баҳсидаги рақиби турнирнинг биринчи ракеткаси голландиялик Скотт Гриекспур бўлади. Бир неча дақиқа аввал Скотт ярим финалда латвиялик Мартинс Поджусдан 6:2, 6:2 ҳисобида устун келди.
Таққослаш учун, 19 ёшли Жўрабек дунё рейтингида 1029-ўринни эгаллаб турибди. Турнирнинг биринчи ракеткаси бўлган 26 ёшли Скотт 510-поғонадан жой олган.
Ҳавола :
Манба : olamsport.com
Фикрлар