Камбэк амалга оширган Синдаров 1,5 млн долларлик турнирнинг асосий баҳслари иштирокчисига айланди

Саудия Арабистони пойтахти Ар-Риёд шаҳрида шахмат бўйича мукофот жамғармаси 1 миллион 550 минг АҚШ долларини ташкил қилувчи нуфузли турнирнинг саралаш баҳслари бўлиб ўтди. 

Esports World Cup Chess турнирининг асосий иштирокчилари, яъни турнирда тўғридан-тўғри қатнашувчи шахматчилар номи аллақачон маълум бўлиб улгурган. Яна тўрт нафар қатнашчи икки босқичдан иборат саралаш ўйинлари орқали асосий босқичга чиқиш учун кураш олиб боришди.    

EWC Chess – Last Chance Qualifier формати 4 та алоҳида гуруҳда 9 турдан иборат швейцарча тизимда ўтказилди. Гуруҳларда кучли тўртликдан ўрин олган шахматчилар плей‑оффга йўл олишди. Ушбу саралаш босқичида ҳамюртларимиздан Жавоҳир Синдаров ва Нодирбек Якуббоев ҳам ўз омадии синаб кўрди. 

Якуббоевнинг 5 очко билан ўз гуруҳида 5-ўринни эгаллаб, ҳал қилувчи плей-офф босқичига йўлланмани қўлга кирита олмагани ҳақида хабар берган эдик. Синдаров эса ҳақиқий матонат кўрсатиб, асосий турнирга йўлланма олди. Жавоҳир кучли гроссмейстерлар жам бўлган С гуруҳида 5,5 очко билан қўшимча кўрсаткичларга кўра 3-ўринни эгаллаб, плей-оффга йўл олганди. 

У аввалига рейтингда ўзидан юқорида бораётган сербиялик гроссмейстер Алексей Саранани 1,5:0,5, кейин блиц бўйича икки карра жаҳон чемпиони Алексей Гришукни худди шу ҳисобда мағлубиятга учратди. Асосий турнирга йўлланма берувчи ҳал қилувчи учрашувда эса америкалик Ҳанс Ниеманндан камбэк эвазига устун келди. 0,5:1,5 ҳисобида ютқазаётган Жавоҳир аввалига дуранг ўйнади, кейин эса рейтингда ўзидан юқорида бораётган рақибини енгиб, мувозанатни тиклади. Ҳал қилувчи армагедон партиясида эса Синдаров қора доналарда ўйнаб, ўзи учун керакли дуранг натижани қайд эта олди.         

Маълумот учун, Esports World Cup Chess турнирида Нодирбек Абдусатторов тўғридан-тўғри асосий баҳсларда иштирок этади. Асосий мусобақа 29 июль куни старт олади.