Камолиддин Муталов: Аёллар боксида келажак учун пойдевор қўйилмоқда

Аввалроқ, терма жамоамиз катта мураббийи Ҳамид Тангрибергеновнинг мусобақа олдидан фикрларини эътиборингизга ҳавола қилгандик. Ўзбекистон бокс федерацияси матбуот хизмати бугун қизлар терма жамоаси мураббийи Камолиддин Муталовнинг фикрларини тақдим этади. 

"Осиё чемпионати қуръаси биз учун омадли келди дея оламан. Чунки, қизларимиз биттадан жанг ўтказиб, ғалаба қозонишса ярим финал йўлланмасини қўлга киритишади. Бу - медаль бор дегани. Биз бу билан тўхтаб қолмаймиз ва юқори марраларни кўзлаймиз. Худо хоҳласа бу чемпионатдан медалсиз қайтмаймиз. Ўзбекистон терма жамоаси умумжамоа ҳисобида биринчи ўринни олади деган умиддаман. 

Ҳозирча -64 кг вазнли боксчи қизимиз Дилфуза Бековада медаль нақд. У қуръага кўра, тўғридан-тўғри ярим финалда иштирок этадиган бўлди. Аммо, мен буни медаль деб ҳисобламайман. Медаль ғалаба орқали қўлга киритилиши лозим. Бу вазиятда ушбу медаль - қоғоздаги медаль. У ғалаба орқали кейинги босқичларга чиқиши керак. Қизларимизга омад тилайман, улар жисмоний ва рухий томонлама мусобақага тайёр. 

Йигитларимиз бизни ғалабаларга ўргатиб қўйишди. Ўзбек боксчилари жаҳонда биринчи. Қизларимиз ҳам шундай савияга чиқиб олишлари керак. 

Бунгача Ўзбекистонда асосан эркаклар боксига эътибор қаратиб келинган. Яқин вақтлардан бошлаб мамлакатимизда аёллар боксига ҳам эътибор берила бошланди. Ўйлайманки, ҳозирги ёш боксчи қизларимиз аввалги авлодга нисбатан техник томонлама устунлар. Ҳозирда қизларимиз ўсмир қизлар ўртасида ҳам, ёшлар ўртасидаги баҳсларда ҳам тобланишмоқда. Бу албатта вақти келиб ўз мевасини беради. Ҳозирда 17-18 ёшли қизлар вақти келиб катталар тоифасида жанг қила бошлашса, улардан кўп нарса кутишимиз мумкин.

Бир ой олдин Ўзбекистон аёллар терма жамоаси аъзолари билан бирга Улан-Удэдаги жаҳон чемпионатида иштирок этдим. Авваллари боксчи қизларимиз илк жанглардаёқ мағлубиятга учраб, мусобақани тарк этишарди. Бу сафар гарчи медаль қўлга кирита олмаган бўлсакда, ғалабали жангларимиз бўлди. Натижа ўз-ўзидан келиб қолмайди. Ҳозирда келажак учун пойдевор қўйилмоқда", - деди Камолиддин Муталов.

Ўзбекистон бокс федерацияси матбуот хизмати (Улан-Батор шаҳридан)