11 май 13:08
Янгиликлар

Теннис

Каспер Рууд Рим "Мастерс"даги иштирокини якунлади

Дунёнинг еттинчи ракеткаси Каспер Рууд учун Рим "Мастерс" турнири муддатидан анча аввал якунига етди.

Норвегиялик теннисчи иккинчи даврада ATP рейтингида 58-ўринни эгаллаб турган сербиялик Миомир Кечмановичга уч сет натижасига кўра имкониятни бой бериб қўйди - 6/0, 4/6, 4/6. Миомир теннисчиларнинг ўзаро учрашувларидаги мувозанатни тиклади - 3:3.

Икки соату 20 дақиқа давом этган баҳсда Рууд 6, Кечманович 7 та эйс зарбасини амалга оширган. Қўшхатолар Касперда кўпроқ бўлди - 5 га 1. Брейклар бўйича ҳам устунлик Рууд томонида бўлди - 5 га 4, лекин бу якунда унга ёрдам бермади.

Энди Кечманович Рим "Мастерс" турнирининг учинчи босқичида Тьяго Монтейрога қарши кортга чиқади. Бразилиялик теннисчи иккинчи даврада ортиқча қийинчиликсиз австралиялик Жордан Томпсондан устун келди - 6/1, 6/3.