“Катта Дубулға”. Битта медал билан умумажамоа ҳисобида 11-ўринни эгалладик

Мусобақанинг сўнгги куни оғир вазн тоифасида ғолиб ва совриндорлар номи маълум бўлди. Мазкур мусобақада Ўзбекистон шарафини тўрт нафар спортчи ҳимоя қилди. Улардан фақат биригина Париждан медал билан қайтадиган бўлди.

Шарофиддин Лутфуллаев финалгача етиб етиб бориб, якунда кумуш медални қўлга киритди. -60кг вазн тоифасида татамига чиққан дзюдочимиз ўз гуруҳида кореялик Харим Ли ва франциялик Седрик Револни мағлуб этди. Ярим финалда бразилиялик Фелипе Пелимдан устун келди. Олтин медал учун кечган баҳсда эса япониялик машҳур спортчи Тору Шишимега ютқазиб қўйди. 

Шу тариқа, “Катта Дубулға” турнири якунига кўра терма жамоамиз медаллар жамғариш бўйича битта кумуш медал билан умумжамоа ҳисобида 71та давлат орасида 11-ўринни эгаллади. Бешта олтин, 4та кумуш, 3та бронза медалига эга дзюдо ватани Япония терма жамоаси бу борада биринчи бўлди. 

Биздан аввалги ўринларни Жанубий Корея, Франция, Голландия, Буюк Британия, Украина, Косово, Канада, Грузия ва Хитой терма жамоалари банд этишди. Жами 17 мамлакат дзюдочилари Франциядан уйга камида битта бронза медали билан қайтишди.