“Катта Дубулға” турниридан битта бронза медали билан қайтишди

Дунёнинг 41та давлати полвонлари иштирок этган мусобақада Ўзбекистон терма жамоаси аъзолари ҳам ўз имкониятларини синовдан ўтказишди. Мураббийларимиз Judo Grand-Slam Tokyo 2016 турнирига иккинчи рақамли ва асосан ёш дзюдочиларни олиб боришганди.

Натижа ҳам шунга яраша бўлди. Тўққиз нафар дзюдочимиздан фақат бири совриндорлар сафидан жой олди. 73 кг вазн тоифасида татамига чиққан Ғиёсжон Бобоев бронза медалини қўлга киритди.

У иккинчи даврадан баҳсларга киришди ва бу босқичда мўғулистонлик Батгерел Баттсетсегни мағлуб этди. Ярим финал йўлланмаси учун кечган учрашувда эса бўлажак чемпион япониялик Соичи Хошимотога ютқазиб қўйди.

Ўтиш баҳсларида курашни давом эттирган Бобоев россиялик Денис Ярцев ва бельгиялик Дирк Ван Тичелтни енгиб, бронза медалига сазовор бўлди.

Қизлар ўртасидаги мусобақада қатнашган Диёра Келдиёрова (52 кг) бешинчи ўринни эгаллади. Гулноза Матниёзова (70 кг) эса еттинчи ўрин билан кифояланди. 60 кг вазндаги Муҳриддин Тиловов ҳам еттинчи бўлди. Қолган барча дзюдочиларимиз саралаш баҳсларидаёқ мағлубиятга учрашди.

Умумжамоа ҳисобида 10та олтин, 9та кумуш, 16та бронза медалини қўлга киритган дзюдо ватани Япония терма жамоаси биринчи ўринни эгаллади. Кучли учликдан биттадан олтин медалга эга Россия ва Мўғулистон терма жамоалари якун ясашди. Терма жамоамиз 9-поғонадан жой олди.