Коллеж ўқувчилари “Алпомиш ва Барчиной” тестларини топширишди

Бунинг учун тест-меъёрларида ёшимизга доир шартларни бажарсак кифоя. Агар шартларини меъёрида бажара олсак, демак соғлом ва бақувватмиз. 

Чирчиқ техника касб-ҳунар коллежида таҳсил олаётган ўғил-қизлар, устоз-мураббийлар ҳам коллеждаги спорт майдончаларида жисмоний имкониятларини синовдан ўтказишди. 

Чинакам спорт байрамига айланган мазкур “Алпомиш ва Барчиной” синовларида иштирокчилар турникда тортилиш, граната улоқтириш, 100 метрга югуриш, ётган ҳолда танани кўтариш ва арғимчоқда сакраш шартларини бажаришди. 

Қувонарлиси, мазкур шартларни деярли барча иштирокчилар юқори баҳо билан топширишди. Бундан кўриниб турибдики, коллежда спорт ишлари доим эътиборда.

Амангул ЮСУПБАЕВА, Чирчиқ техника касб-ҳунар коллежи жисмоний тарбия раҳбари: 

- Асосий мақсадимиз - ёшлар ўртасида жисмоний тарбия ва спортни кенг тарғиб қилиб, оммалаштиришдан иборат. Анъанага айланган ушбу тест- меъёрларида ўқитувчи ва ўқувчиларимиз зўр иштиёқ билан қатнашишади. Меъёрларни бажаролмаган иштирокчи жисмоний ҳолатини кучайтириши учун янаям спортга ошно бўлади. 

Шунингдек, коллежимизда волейбол, баскетбол, стол тенниси, шахмат-шашка тўгараклари йўлга қўйилган бўлиб, мазкур тўгаракларда иштирок этаётган ўқувчиларимиз турли мусобақаларда совринли ўринларни ҳам банд этишмоқда. “Баркамол авлод” спорт ўйинларидан жой олган баскетбол бўйича жамоамиз республика босқичида иштирок этиш ҳуқуқини қўлга киритди. Ҳозирда тайёргарлик авжида.

Илҳом РАҲМОНОВ, ўз мухбиримиз