Колумбия терма жамоаси бош мураббийи: "Кўпчилик Ўзбекистонни осон рақиб деб ўйлаши мумкин, аммо бу катта хато"

Ўзбекистон ҳақида...

Бизнинг гуруҳдаги илк рақибимиз — Ўзбекистон терма жамоаси. Кўпчилик уларни осон рақиб деб ўйлаши мумкин, аммо бу катта хато. Ўзбекистон сўнгги йилларда жуда катта ўсишга эришди, улар Осиёда кучли тартиб ва жисмоний тайёргарлик эвазига ажралиб туришади. Бундай турнирларда дебют ўйинлари доим оғир ўтади. Биз рақибни максимал даражада ҳурмат қиламиз ва майдонга фақат 3 очко учун тушамиз. Илк ўйиндаги ғалаба кейинги босқич йўлланмаси учун пойдевор вазифасини ўтайди

Тайёргарлик ва жамоадаги муҳит ҳақида

"Биз ушбу турнирга узоқ ва тинимсиз меҳнат эвазига етиб келдик. Ҳозир жамоада ажойиб ички муҳит шаклланган. Тажрибали футболчилар ва ёш иқтидорлар ўртасидаги балансни топа олганимиздан хурсандман. Жаҳон чемпионати — бу мутлақо бошқа даражадаги мусобақа. Бу ерда сиз узоқ муддатли режалар ҳақида эмас, фақат ва фақат навбатдаги учрашув ҳақида ўйлашингиз керак. Мехикодаги иқлим ва шароитларга мослашиш жараёни кўнгилдагидек ўтди, йигитлар жисмоний ва руҳий жиҳатдан баҳсга тайёр".

Хамес Родригеснинг ҳолати ҳақида:

"Хамеснинг ҳолати яхши, у жисмоний жиҳатдан ўсиб бормоқда. Унинг иқтидори ва майдонни кўра олиш қобилияти шуни англатадики, у бошқалар каби кўп югурмаган тақдирда ҳам, ўйинга аниқлик киритади ва энг муҳим паллаларда вазиятни ҳал қила олади".

Бўлажак рақиблар ва тактика ҳақида

"Ҳозирги футболда номлар ҳеч қандай аҳамиятга эга эмас. Биз ҳар бир рақибни, уларнинг ўйин услубини синчиклаб ўрганиб чиқяпмиз. Турнирнинг дастлабки ўйинлари шуни кўрсатдики, ҳар қандай жамоа кутилмаган совға тақдим этиши мумкин. Биз тактик жиҳатдан мослашувчан бўлишимиз шарт. Майдонда тўп назоратини қўлга олиш ва ҳимоядан ҳужумга тезкор ўтиш — бизнинг асосий қуролимиз бўлиб қолади. Биз ўз ўйинимизни рақибга сингдира олишимиз керак".