Кореяликлар Тель-Авивда биринчи бўлишди, бизникилар ўтган йилги натижани яхшилашди

Йилнинг дастлабки IJF турнирида дунёнинг 5 қитаъси 83 давлатидан дзюдочилар иштирок этди. Якунда кореяликлар медаллар жамғариш бўйича 3та олтин, 3та кумуш, 2та бронза, жами 8та медаль билан умумжамоа ҳисобида биринчи ўринни банд этишди. Иккинчи ўринни япониялик дзюдочилар эгаллашди. Дзюдо ватани вакиллари 2тадан олтин ва бронза медалини қўлга киритишган. Кучли учликка мезбонлар якун ясаб беришди. Исроил терма жамоаси 2та олтин ва битта бронза медалига эга чиқди.

Буюк Британия 2та, Словения, Франция, Россия, Италия ва Австралия терма жамоалари эса биттадан олтин медаль билан уйга қайтишди. Жами 29 мамлакат делегацияси камида битта бронза медалига сазовор бўлишди. 

Хабар берганимиздек, Тель-Авив Гран-присида Ўзбекистон терма жамоасининг 13 нафар дзюдочиси иштирок этди. Ҳамюртларимиздан Гулноза Матниязова (-78 кг), Давлат Бобонов (-90 кг) ва Бекмурод Олтибоев (+100 кг) кучли бешликдан жой олиш баробарида Токио-2020 Олимпиадаси йўлидаги қимматли 252 очкони ўз ҳисобларига қўшиб қўйишди. Ўтган йилги Тель-Авив Гран-присида бизда биттагина бешинчи ўрин бўлган эди.