Кучли зарба соҳиби билан дилдан суҳбат

Албатта, бу боксчиларимиз жаҳон проф бокс оламида ўз сўзларини айта олишган. Ҳозирги кунда мамлакатимизда бу чарм қўлқоп усталарининг муносиб издошлари етишиб чиқмоқда. 

Уларга Жанубий Кореянинг “Kolo Buffalo” промоушени билан шартнома имзолаган Хусниддин Пўлатов, Элдор Саидов, Россиянинг кўзга кўринган промоутерлик компанияси “RMKA” таркибида фаолият юритаётган Равшан Умурзоқов, Мирзоҳид Абдуллаев, Степан Партнов, Қобилжон Хосилов, Жалолиддин Ўктамов, Сардор Музаффаров, Муҳиддин Ражаббоев, Бексултон Равшанов қолаверса, ҳозирда жаҳон бокс оламида порлаб чиқаётган Шоҳжаҳон Эргашев, Қудратулло Абдуқаҳҳоров каби истеъдодли ёш боксчилар яққол мисол бўла олади. 

Ўз ўрнида Ўзбекистон профессионал бокс федерацияси билан биргаликда бир қатор промоутерлик клубларининг ҳам саъй-ҳаракати натижасида профессионал бокснинг оммавийлиги тобора ошиб бормоқда. Ҳозирда мамлакатимизда 100 нафарга яқин боксчиларимиз профессионал йўналишда ўз жангларини олиб бормоқда. 

Улар орасида келгусида жаҳон профессионал бокс оламида яхши натижаларни қайд эта оладиган иқтидорлар етарлича топилади. Бугун биз ана шундай маҳоратли чарм қўлқоп усталаридан бири Умид Рустамов билан уюштирилган суҳбатни эътиборингизга ҳавола қиламиз. 

- Сизни ҳаваскор боксдаги жангларингизга гувоҳ бўлмаган эдим. Профессионал бокс кечасида эса ўзим учун сизни кашф қилдим. Айтингчи, ҳаваскор боксда фаолият олиб борганмисиз?

- Биласизми, ҳаваскор боксда фаолият олиб бормаганман? десам нотўғри бўлади. Бир-икки маротаба мусобақаларда иштирок этганман. Кейин фаолиятимда танаффус юзага келди. Катта спортга қайтганимдан сўнг жисмоний ҳолатимни ва зарбаларим кучини инобатга олиб, устозларим профи рингда ўзимни синаб кўришни маслаҳат беришди. Натижалар ёмон эмас. 

- Умуман олганда, бокс оламига кириб келишингиз тарихи қандай бўлган?

- Ёшлигимдан Муҳаммад Алига ҳавасим кучли бўлган. Қолаверса, мексикалик Сауль “Канело” Альвареснинг ашаддий мухлисиман. Ана шу икки боксчи сабаб бу оламга кириб келганман.

- Барча жангларингизни юртимизда ўтказдингиз. Хорижда ҳам жанг ўтказиш режада борми?

- Албатта. Мақсадларимиздан бири айнан нуфузли йўналишларда жанг қилиш. Бу тез орада амалга ошади, деб ўйлайман!

- Интернетдаги шахсий саҳифаларингизда кучли зарбага эга эканлигингизни кўп бора эътироф этишганини кўрдим. Улар орасида таниқли боксчиларимиз ҳам бор. Қолаверса, проф боксдаги барча жангларингизда нокаут билан ғалаба қозонгансиз. Бу зарба кучи туғма истеъдодми ёки меҳнат маҳсули?

- Юқорида айтиб ўтганимдек, кучли тарафим ҳам айнан зарбамда десам янглишмаган бўламан. Ҳар холда шундай дейишади-ку (кулади). Саволингизга келсак, ҳар иккиси ҳам. Қолаверса, буни меҳнат орқали янада такомиллаштириш зарур.

- Жангларингизни кузатиб, машҳур боксчи Майкл Грант ёдимга тушди. Яъни, у каби сиз ҳам дастлаб ринг марказини рақибга топширасизда, вақтини кутиб бир зарба билан жанг масаласини ҳал қиласиз. Деярли барча жангларингизда шундай. Лекин бу услубни рақиблар ўрганиб олиши ҳам мумкин. Бу ҳолатга қарши “Б” режаcи ҳам борми?

- Бу саволингиз менинг жанг олиб боришимга нисбатан жуда тўғри ёндошиш бўлди. Албатта, аксарият жанглардаги услубим худди шундай. Лекин рақибга қараб тактика танлаймиз. Демоқчиманки, нафақат “Б” балки, В, Г, Д, Е, Ё режаларимиз ҳам бор (кулади).

- 91 кг вазн тоифасида жанг олиб борасиз. Айтингчи, юртимизда сизнинг вазн тоифангиздагиасосий рақобатчи ким?

- Соғлом рақобатнинг бўлгани яхши. Мурод Азимовни таъкидлаган бўлардим. У билан рингда рақибмиз. Ринг ташқарисида эса, ака-ука. 

- Балки, ҳар бир жанг учун қанча гонорар олишингизни ошкор этармиз?

- Бу сир бўлақолсин. 

- Юқорида Канело Альваресни мухлисиман дедингиз. Геннадий Головкин билан бўлган жангдаги дурангни адолатли, деб ўйлайсизми?

- Келинг, шундай бўла қолсин. Ахир, ҳакамлар жангни сизу биздан яқинроқада томоша қилишдику!

- Демак, иккинчи жангда ҳам Саулга мухлислик қилар экансизда?

- Албатта. Лекин Геннадий Головкинга ҳам ҳурматим чексиз.

- Келинг, энди машҳур боксчилар ҳақида блиц саволлар бераман. Сиз улардан бирини танлашингиз шарт ва танлаган боксчига изоҳ берасиз.

Блиц саволлар:

- Муҳаммад Али ёки Жо Фреззер?

- Муҳаммад Али. Чунки у Қирол!

- Майк Тайсон ёки Леннокс Льюис?

- Льюис. Жуда Ақлли боксчи

- Рой Жонс ёки Антонио Тарвер?

- Жонс. Бетакрор ва ўзига хос боксчи

- Владимир Кличко ёки Виталий Кличко?

- Владимир. Матонатли боксчи

- Руслан Чагаев ёки Александр Поветкин?

- Руслан Чагаев. Ватанимни, халқимни севаман

- Насим Хамит ёки Марко Антонио Баррера?

- Баррера. Шиддаткор боксчи

- Артуро Гатти ёки Оскар Дела Хойя?

- Гатти. Таърифга тил ожиз

- Константин Цзю ёки Рикки Хаттон?

- Костя. Чунки у Афсона!

- Флойд Мейвезер ёки Мэнни Пакьяо?

- Пекмен. Тезкор!

- Шоҳжаҳон Эргашев ёки Қудратулло Абдуқаҳҳоров?

- Ҳар иккиси. Агар танлаш шарт бўлса, Қудратулло Абдуқаҳҳоров.

Аҳмадбек ЭШМАТОВ суҳбатлашди