14 янв 20:15
Янгиликлар

Футбол

"Локомотив"нинг ОЧЛдаги рақиби руминиялик футболчини сотиб олди

Саудия Арабистонининг "Ал Таавон" клуби 2017 йилги Осиё чемпионлар лигасида Ўзбекистон чемпиони "Локомотив" билан бир гуруҳдан ўрин олган.

"Ал Таавон" ўз сафини Руминия терма жамоаси аъзоси Лусиан Санмартеан билан тўлдириб олди. 1980 йил туғилган ҳужумкор ярим ҳимоячи Руминия терма жамоасида 21та ўйинда майдонга тушган.

2015 йил Саудия Арабистонининг "Ал Иттиҳод" клуби сафида фаолият олиб борган Санмартеаннинг охирги клуби "Пандури Таргу Жиу" бўлганди. У 2016 йилги Европа чемпионатида ҳам Руминия терма жамоаси сафида ўйнади.

Маълумот учун, "Ал Таавон"ни руминиялик мураббий Константин Галча бошқариб бормоқда.

Эслатиб ўтамиз, "Локомотив" ОЧЛ гуруҳ босқичи 1-турини Саудия Арабистонида айнан "Ал Таавон"га қарши ўтказади. Бу ўйин 20 февраль куни бўлиб ўтади.