Лос-Анжелес-2028: ХОҚ World Boxing томонидан тақдим этилган саралаш тизимини тасдиқлади

Мазкур тизимни халқаро World Boxing федерацияси тақдим этган.

Расмий маълумотга кўра, Олимпиада тарихида илк бор тўлиқ гендер тенглиги таъминланади: эркаклар ва аёллар еттитадан вазн тоифасида медаллар учун баҳс олиб боради. Умумий иштирокчилар сони 248 нафар спортчини ташкил этади (эркаклар ва аёллар ўртасидаги мусобақаларда 124 нафардан).

Ишлаб чиқилган саралаш тизими бир нечта босқичдан иборат. Боксчилар Олимпиада йўлланмалари учун учта Жаҳон лицензион турнири ва бешта қитъа мусобақасида кураш олиб боришлари мумкин бўлади.

Саралаш даврига 2027 йили Қозоғистонда ўтадиган World Boxing Жаҳон чемпионатида старт берилади. Шундан сўнг 2027 ва 2028 йиллар давомида қитъавий турнирлар ташкил этилади.

Саралаш цикли 2028 йилдаги иккита жаҳон квалификация турнири билан якунланади. Яқин вақт ичида World Boxing мусобақаларни ўтказиш учун аризалар қабул қилишни бошлайди.

Таъкидлаш жоиз, World Boxing ҳам саралаш жараёнини, ҳам Лос-Анжелесдаги Олимпия ўйинларидаги мусобақаларни ташкил этишни назорат қилади. 

Олимпиада-2028 да бокс бўйича медаллар қуйидаги вазн тоифаларида ўйналади:

Эркаклар:
55 кг гача
60 кг гача
65 кг гача
70 кг гача
80 кг гача
90 кг гача
90 кгдан юқори.

Аёллар:
51 кг гача
54 кг гача
57 кг гача
60 кг гача
65 кг гача
70 кг гача
75 кгдан юқори.

2028 йилги ёзги Олимпия ўйинлари АҚШнинг Лос-Анжелес шаҳрида 2028 йил 14–30 июль кунлари бўлиб ўтади.