Магнус Карлсен ва Фабиано Каруанани ўз туғилган кунида мағлуб этган Синдаров куннинг энг яхши шахматчиси бўлди

Умумий мукофот жамғармаси 750 000 долларни ташкил этувчи якуний Freestyle Chess Champion 2025 турнири бош соврини учун сайёрамизнинг саккиз нафар гроссмейстери баҳс олиб боряпти. 

Қувонарлиси, Жавоҳир Синдаров саралаш баҳсларини биринчи ўринда якунлади. Айнан кеча 20 ёшга тўлган ҳамюртимиз 1-турдаёқ жаҳон рейтинги пешқадами норвегиялик Магнус Карлсенни чиройли тарзда мағлуб этди. Кейин рейтингда ўзидан юқорида турган америкалик Фабиано Каруанани ҳам енгишга муваффақ бўлди. Эронлик Парҳам Мақсудлу ва Ханс Ниеманн ҳам таслим этилди. Аржун Эргаиси, Винсент Кеймер ва Левон Аронян билан дуранг ўйнади. 

Эътиборлиси, Жавоҳир Синдаров ташкилотчилар томонидан куннинг энг яхши шахматчиси деб топилди. Бу унинг туғилган кунига ажойиб совға бўлди. Тўрт ғалаба, уч  дуранг қайд этган Синдаров саралаш баҳслари ғолибига айланди.

 Турнир жадвали пешқадами сифатида у 1/4 финалдаги рақибини танлаш ҳуқуқига эга эди. У кутилганидек, 7 та учрашувнинг барчасида мағлубиятга учраган Парҳам Мақсудлуни танлади. Бугунги плей-офф баҳслари бизнинг вақт билан соат 16:00`да бошланади.