Маҳмуд Мурадов октагонга чиқадиган оқшомнинг марказий жанги эълон қилинди

Ташкилотчилар UFC Fight Night сериясига кирувчи ушбу турнирнинг асосий жангини эълон қилишди. Унда ўрта вазн тоифаси вакиллари - грузиялик Роман Долидзе ва франциялик Нассурдин Имавов ўзаро октагонда тўқнаш келишади. 

Маълумот учун, 35 ёшли Роман Долидзе шу йилнинг март ойида учта ғалабали сериясидан сўнг Марвин Ветторига ютқазиб қўйганди. Шундан сўнг грузияликнинг Дерек Брансон ва Жаред Каннонирга қарши жанглари бекор бўлди. Брансон ташкилотни тарк этган бўлса, Жаред жароҳат сабаб Долидзени рақибсиз қолдирган эди. 

Россияда туғилган, ҳозирда Франция шарафини ҳимоя қилаётган 28 ёшли Нассурдин Имавов эса бу йил ҳисобидан иккита жанг ўтказди. Дастлаб у Шон Стриклендга очколар ҳисобига кўра имкониятни бой бериб қўйди. Крис Кертис билан жанги эса ўтказилмаган деб топилди. Иккинчи раунддаги бош билан тўқнашувдан кейин Крис жангни давом эттиришдан бош тортганди. Унгача асли келиб чиқиши доғистонлик бўлган Нассурдин кетма-кет учта ғалабани тантана қилган. Йен Хейниш ва Эдмен Шахбазянни нокаутга учратган, Хоакин Баклидан ҳакамларнинг якдил қарори билан устун келган эди.

Айни пайтда Роман Долидзе UFC ўрта вазнлилар рейтингида еттинчи, Нассурдин Имавов эса ўн иккинчи ўринни эгаллаб турибди. Айнин шу оқшомда ҳамюртимиз Маҳмуд Мурадов ҳам ўз жангини ўтказади. Аралаш яккакураш устамиз россиялик Алиасхаб Хизриевга қарши октагонга кўтарилади.