19 май 14:40
Янгиликлар

Футбол

"Манчестер Сити"ни бошқариш учун асосий номзод номи маълум

Ўн йилдан бери "шаҳарликлар"ни бошқариб келаётган испаниялик мураббийнинг клубдан кетиши деярли ойдинлашди.

"Челси"нинг собиқ бош мураббийи Энцо Мареска Хосеп Гвардиола ўрнига "Манчестер Сити" бош мураббийи бўлишга асосий номзод ҳисобланмоқда, деб хабар бермоқда BBC.

Ушбу маълумотни журналист Давид Орнштейн ўзининг Х ижтимоий тармоғида тасдиқлади. Гвардиола мавсум охирида "Манчестер Сити"ни тарк этади, клуб эса ҳозирча вазиятни шарҳламаяпти.

Аввалроқ Гвардиоланинг расмий равишда кетиши 24 май куни АПЛ 38-турида "Астон Вилла"га қарши ўйиндан кейин эълон қилиниши айтилган эди.

Маресканинг сўнгги иш жойи "Челси" бўлиб, у 2024 йил июлидан 2026 йил январигача жамоани бошқарган. Унинг раҳбарлигида лондонликлар Лига конференцияси ва Клублар ўртасидаги жаҳон чемпионатини ютишган.