Матчболдан чиқиб кетган Жокович Аделаида турнири ғолиби бўлди

Ҳал қилувчи финал учрашувида дунёнинг бешинчи ракеткаси бўлиб турган сербиялик Новак Жокович ATP рейтингида 33-поғонада бораётган АҚШ вакили Себастьян Кордага қарши кортга чиқди ва қийин ғалабани қўлга киритди - 6/7(8), 7/6(3), 6/4.

Уч соату 11 дақиқа давом этган баҳсда Новак матчболдан чиқиб кетишга муваффақ бўлди. Бу теннисчиларнинг ўзаро ўтказган илк учрашуви эди. Жокович 7 та эйс, 4 та қўшхато ва 2 та брейк қайд этди. Корда эса 15 та эйс, 4 та қўшхато ва 1 та брейк-пойнтга эга бўлди. 

Сербиялик теннисчи фаолиятидаги 92-совринини қўлга киритди. Бу теннис тарихидаги тўртинчи кўрсаткич ҳисобланади. У Рафаэль Надаль билан тўртинчи ўринни бўлишиб турибди. Аделаидадаги муваффақиятли иштирок унга 250 рейтинг очкоси ҳамда 94,560 доллар мукофот пули келтирди. Корда эса 150 балл ва 55,035 доллар ишлаб олди.