Махачев Жонсга жавоб қайтарди: "Сен доим айбсизсан"

"Жон, мен ҳеч қандай ҳолатда сенинг ютуқларингни камситмоқчи эмасман. Аммо шундай кўринадики, бутун ҳаётинг қандайдир тарзда қоидаларни бузиш билан боғлиқ ва қандайдир йўл билан сен доим айбсиз бўлиб чиқасан", – деб ёзди россиялик спортчи ижтимоий тармоқда америкалик рақибига мурожаат қилиб.

Аввалроқ, Махачев берган интервьюсида нима учун Жонснинг ғалабали серияси UFC`да рекорд деб ҳисобланмаслигини тушунтириб, унинг допинг-тестлардан ўта олмагани ва Даниэль Кормье билан бўлган жанг натижаси бекор қилинганини эслатган эди. Шундан сўнг ҳисоб қайтадан бошланган. Америкалик спортчи бу гапларни оғриқли қабул қилиб, тақиқланган моддаларни истеъмол қилмаганини даъво қилди ва россиялик жангчига унинг нокаут билан учраган мағлубиятини эслатиб ўтди.

Жорий йилнинг август ойида Ислам Махачев ярим ўрта вазн тоифасида UFC чемпионлик камарини Йен Мачадо Гэррига қарши жангда муваффақиятли ҳимоя қилиб, ташкилотнинг энг узун ғалабали серияси бўйича рекордини янгилаганидан сўнг, Жон Жонс россиялик спортчининг ютуғини шубҳа остига олди. У Махачевнинг "барча замонларнинг энг буюк жангчиси" унвонига даъвогар бўла олмаслиги ҳақидаги фикрини билдирди.