«Мен қишлоқданман, уришишни яхши кўраман». UFCнинг энг ёрқин жангчиси ҳақида

Жастин Гэтжи 30 ёшда, ММАда 2011 йилда дебют қилган. Йигирмата жангда ғалаба қозонган, иккитасида мағлуб бўлган. Фаолиятидаги энг ёрқин жангни шу йили UFC ESPN2 турнирида ўтказди. Жастин Гэтжи ҳамда Эдсон Барбоза ўртасидаги жанг UFCнинг барча мухлисларига ёқди. Қаҳрамонимиз жангнинг биринчи раундида ўнг ҳук зарбаси билан рақибини нокаут қилди. Жанг якунлангандан сўнг матбуот анжуманида Жастин енгил вазн тоифасида UFC чемпиони Хабиб Нурмагомедовни октагонга чорлади. "Чемпион бўлишни хоҳлайман.Чемпионлик жангига чиқмоқчиман. Мен Хабиб учун ҳақиқий ҳавфман”, - деди Жастин Гэтжи.

"Нимага сиз бунчалик ишонч билан фикр билдиряпсиз?" деб берилган саволга, "Мен тейкдаундан қочишни яхши биламан, жуда тезкорман. Хабиб мендакалар билан ҳали жанг қилмаган” деб жавоб қайтарди. 

Гэтжи UFCга 2017 йилда келди, UFCга қадар у PFL мусобақаларида иштирок этар ва у ерда чемпион ҳисобланарди. Жастиннинг дебют жангидаги рақиби тажрибали, олти йилдан бери UFCда иштирок этаётган Майкл Жонсон бўлди. Икки жангчи ҳам даҳшатли жанг ташкил қилиб беришди. Гэтжи рақибини иккинчи раундда тирсак зарбаси билан нокаут қилди. Гэтжи бу жанги учун иккита бонус олди (ҳар бир бонус 50 минг доллар). Шунингдек, бу жанг Sherdog, Bloody Elbow va MMAJunkie ташкилотлар томонидан йил жанги деб эълон қилинди. 

Ғалабадан сўнг Жастин Гэтжи иккита жангда мағлуб бўлди. Дастлаб 2017 йилнинг декабрь ойида Эдди Альварес томонидан нокаутга учратилди. 2018 йилнинг апрел ойида Дастин Порьега имкониятни бой беради. Аммо, ҳар икки баҳс ҳам UFC 218 ва UFC ON Fox турнирларининг энг яхши жанги деб эълон қилинган. Гэтжининг уришиш усули оддий, рақибини бутунлай уради ёки ўзи шундай бўлади. 

2018 йил августида Жастин Жеймс Викка қарши октагонга чиқди. Жеймс Вик машҳур жангчи эмас, лекин Гэтжига қадар UFCда кетма-кет тўртта жангда ғалаба қозонганди. Гэтжи рақибини дастлабки раунднинг иккичи дақиқасидаёқ кучли зарбалари билан нокаут қилди. Шубҳасиз, бу жанг учун ҳам оқшомнинг энг ёрқин ғалабаси учун бонусни олди. Шунингдек, Гэтжи Барбоса билан бўлган жанг учун ҳам бонуслар олди. Ҳисобларга қарасак, Гэтжи UFCда олтита жанг ўтказиб, уларнинг бештасида оқшом жанги бонусларни олган.

«Агар сиз менинг жангимга бормасангиз, бутун умрга пушаймон бўласиз», - деб таъкидлади Барбоса устидан қозонилган ғалабадан сўнг.

Ҳозирги вақтда Жастин Гэтжи UFCда энг ёрқин жангчи. Шундай жангчилар учун ҳам мухлислар ММАни ёқтиришади, шундай жангчилар учун ҳам ММАни энг қонли спорт тури сифатида кўришади.

Жастин Гэтжи Саффорд шаҳарчасида, Аризона штатида туғилган. Тўрт ёшлигидан эркин кураш билан шуғулланган.

«Мен қишлоқданман, уришишни яхши кўраман»,-деган Гэтжи. 2010 йилда NSAAда еттинчи ўрини эгаллайди, бундан бир умр фахрланишини таъкидлаган. Жастин кураш усуллари билан катта бўлган, лекин ММАга келгандан сўнг унинг асосий қуроли кучли зарбалар бўлди. Жастин тейкдаундан қочиш бўйича UFCда рекордчи ҳисобланади. Бунга сабаб сифатида Гэтжига рақиблик қилган жангчиларнинг асосий уришиш усуллари туриб жанг қилиш бўлди. 

Гэтжи тезроқ Хабиб билан жанг қилишни истамоқда. Лекин, Нурмагомедовнинг кейинги жанги у билан бўлмаслиги аниқ. Жастин Гэтжи учун ҳозирда энг қизиқарли жанг Конор Макгрегор билан бўлади. Чунки ҳар икки жангчи ҳам уришишни яхши кўради.

Ниғмонхўжа Нозимов тайёрлади