Мэнни Пакьяо - Роландо Ромеро жангининг қачон ўтказилиши айтилди

Бу ҳақда филиппинлик афсонанинг менежери Шон Гиббонс Fight Hype’га берган интервьюсида маълум қилди.

Гиббонснинг сўзларига кўра, улар дастлаб ушбу жангни 24 январда ўтказмоқчи бўлишган, бироқ трансляция UFC 324 турнири билан рақобат қилмаслиги учун бу санадан воз кечилган.

"Март ойидаги жанг бўйича музокаралар олиб борилмоқда, - деди у. - Ролли WBA’дан Шаҳрам Ғиёсовга қарши мажбурий ҳимояни кечиктиришни сўради. Бу ярим ўрта вазндаги жанг бўлади. Мэнни 40 ёшида Кит Турманни мағлуб этиб, ўрнатган ўз рекордини янгилаш ва яна энг кекса ярим ўрта вазн тоифасида жаҳон чемпиони бўлишни жуда хоҳлайди".

Эслатиб ўтамиз, 46 ёшли Пакьяо Ромерони мағлуб этса, нафақат ўз рекордини янгилайди, балки бокс тарихида 49 ёшида ярим оғир вазн тоифасида WBA чемпионлигини қўлга киритган Бернард Хопкинсдан кейин иккинчи энг кекса чемпионга айланади.

Маълумот учун, ҳамюртимиз Шаҳрам Ғиёсов Роландо "Ролли" Ромеронинг WBA чемпионлик камари учун мажбурий даъвогар ҳисобланади.