Мерганлар мусобақаси давом этмоқда

Ёшлар ўртасида спортнинг оммавийлигини ошириш, жумладан, ўқ отиш спорти турлари бўйича юқори малакага эга бўлган, мамлакат терма жамоасига муносиб номзодларни саралаш вазифасини ўтовчи мусобақада иштирокчилар икки ёш тоифасида мерганлик салоҳиятларини намойиш этишди. Пневматик милтиқ, пневматик туппонча ҳамда микст (аралаш жуфтлик) йўналишидаги  мусобақалар 16 ёшгача бўлган йигит қизлар ҳамда ундан катталар ўртасида алоҳида ташкил этилди. 

- Бу орқали, халқаро мусобақаларда иштирок этувчи ёшлар ва катталар терма жамоамизга муносиб номзодларни саралаб оламиз,- дейди Ўзбекистон ўқ отиш спорти федерацияси бош котиби Жалолиддин Атабуллаев. 

Мусобақа натижаларига қараб шуни тушунишимиз мумкинки, республикамиз вилоятларида ўқ отиш спорт тури янада жадал ривожланаётгани, айниқса, Андижон,  Наманган, Самарқанд, Қашқадарё, Хоразм, Фарғона вилоятларида вояга етаётган иқтидорли ёшлар спорт тури инфратузилмаси анча ривожланган пойтахт вакиллари билан муносиб рақобат қилишмоқда. Мутахассислар Ўзбекистон ўқ отиш спорти федерацияси очиқ кубоги давомида Тошкент вилояти спортчилари Ойбек Асилов, Сухроб Мирзажонов, Зайнаб ва Мадинабону Пардабоеваларнинг маҳорат бобида ўзларидан анча катта ёшли спортчилардан ўзиб кетаётганини таъкидлашди. 

Гарчи, Ўзбекистон ўқ отиш спорти федерацияси очиқ кубоги якунланган бўлсада, иштирокчилар навбатдаги мусобақа - Республика техник ва амалий спорт турлари маркази томонидан ташкил этилаётган Ўзбекистон кубоги ғолиблик учун курашни давом эттиришмоқда.