Месси Испания терма жамоаси сафида ўйнаши мумкин бўлган

Аргентиналик футболчининг сўзларига кўра, Испания футбол федерацияси вакиллари уни бу таклифни қабул қилишга кўндиришга уринган.

"Маълум бир пайтда Испания терма жамоаси мен билан боғланди. Улар мени фикримдан қайтаришга ҳаракат қилишди. Мен аргентиналикман, лекин Барселонага жуда ёш пайтимда келганман. Испания учун ўйнаш имконияти бор эди, аммо мен ҳар доим Аргентина шарафини ҳимоя қилишни истаганман", – деди Месси.

Месси Аргентина терма жамоаси сафида 2005 йил 17 август куни Венгрияга қарши ўйинда дебют қилган. Ўшанда у 64-дақиқада майдонга тушган, аммо бир дақиқадан кейин қўпол ўйин учун майдондан четлатилган.

Мураккаб стартга қарамай, Месси миллий жамоа сафида 196 ўйин ўтказиб, 115 та гол урган. Терма жамоа таркибида у икки марта Америка Кубогини қўлга киритган, шунингдек, 2022 йилда жаҳон чемпионига айланган.