ММА жангчиси Мурод Хонтўраев яна пичоқланди

Айни вақтда спортчи Тошкент шаҳар 1-сонли клиник шифохонасига жойлаштирилган. Ҳуқуқ-тартибот органларидаги манбанинг тасдиқлашича, ушбу ҳолат бўйича ички ишлар органлари ходимлари томонидан жиноят иши очилган, тергов ҳаракатлари олиб борилиши устидан прокуратура назорати ўрнатилган.

Мурод Хонтўраев 21 июнига ўтар кечаси Юнусободдаги тунги клубда рўй берган можаро иштирокчиси бўлган, у кўкрак қисмига пичоқ билан берилган зарбадан жароҳат олганди. Кейинроқ шифохонадан милицияга сўроқ бериш учун олиб кетилган, суд ҳукми билан қамоққа олинганди.

Суд уни Жиноят кодексининг 277-моддаси 3-қисми «а» банди («такроран ёки хавфли рецидивист томонидан безорилик содир этилиши») бўйича айбдор деб топган («Осиё айиғи» лақаби билан машҳур Мурод Хонтўраев илгари ҳам судланган).

Аввалига унга 3 йиллик қамоқ жазоси хавф солаётганди. 12 октябрь куни жиноят ишлари бўйича Яккасарой тумани судида Мурод Хонтўраевга жарима тарзидаги жазони қўллади. Спортчи энг кам иш ҳақининг 94 баравари миқдорида жарима (16 190 560 сўм) тўлаб, озодликка чиқди.

Маълумот учун, Мурод Хонтўраев 1987 йилда Тошкент шаҳрида туғилган. У Тошкентдаги Плеханов номли Россия иқтисодиёт университети филиали учинчи курс талабаси ҳам ҳисобланади. Оилали ва икки нафар фарзанди ҳам бор.