МОҚ президенти ЖЧга тайёргарлик кўраётган дзюдочилар билан учрашди ФОТО

Хабарингиз бор, 25-31 август кунлари Токио шаҳрида келаси йили ушбу мамлакатда ўтказилувчи Олимпия ўйинларига энг катта рейтинг очкосини бериши билан аҳамиятли бўлган жаҳон чемпионати ташкил этилади. Айни кунларда терма жамоамиз аъзолари тайёргарлик машғулотларига зўр беришган.

Машғулотга ташриф буюрган Рустам Мавзурович дзюдочиларимизнинг тайёргарлиги билан яқиндан танишди, улар билан дўстона суҳбатлашди ҳамда ўз тавсияларини берди. Олимпия ўйинларини дзюдо мусобақаси бошлаб бериши ва илк медаллар айнан ушбу спорт туридан ўйналишини инобатга олсак, дзюдочиларимиз зиммасидаги масъулият қай даражада эканлиги ойдинлашади. Боиси, илк кунларданоқ қўлга киритилажак медаллар делегациямизнинг қолган спортчилари кайфиятига ижобий томондан таъсир қилади.     

Ўз ўрнида мусобақада иштирок этувчи терма жамоа спортчилари ҳамда уларнинг мураббийлари ҳам бу масъулиятни тўла ҳис этаётганлари, жаҳон чемпионатидан медаллар ҳамда қимматли рейтинг очколари билан қайтиш учун астойдил ҳаракат қилишларини таъкидладилар.

Эслатиб ўтамиз, Токиодаги жаҳон чемпионатида сайёрамизнинг 5 қитъаси, 141 давлатидан жами 835 нафар (506 эркак, 329 аёл) дзюдочи мусобақа медаллари ҳам Олимпиаданинг муҳим рейтинг очколари учун татамига чиқади. Жаҳон чемпиони 2000 рейтинг очкосини қўлга киритади.