Моуриньо нима учун Загребда Хорватия - Украина ўйинини томоша қилди?

Маълумотларга қараганда, португалиялик мутахассис шунчаки ўйинни томоша қилиш учун Хорватия пойтахтига келмаган. У хорватиялик ҳужумчи Иван Перишич ҳамда унинг агентлари билан музокара ўтказишни мақсад қилган.

Vecernji List нашрининг хабар беришича, “Интер” клубида тўп тепаётган бу ҳужумчига “Манчестер Юнайтед”дан ташқари Англиянинг яна учта гранд клуби - “Челси”, “Ливерпуль” ва “Арсенал” ҳам жиддий қизиқиш билдирган.

Перишичнинг шу йилги ёзги трансфер бозори чоғидаёқ Миланнинг “Интер”идан Туманли Альбионга кўчиб ўтиши кутиляпти. “МЮ” футболчининг трансфери учун тахминан 40 миллион евро тўлайди.

Эътиборга молик жиҳати шундаки, Украинага қарши кечган ўйинда Перишич дисквалификация сабаб Хорватия терма жамоасига ёрдам бера олмади. Жамоаси эса кичик 1:0 ҳисобида ғалаба қозонди.

Маълумот учун, 28 ёшли ҳужумчи “Интер” таркибида 33та учрашувда майдонга тушиб, 9та гол киритган ва 4та голга эса ассистентлик қилган.