Мураббий ва дзюдочиларга хайфсан эълон қилинди

Йиғилиш кун тартибида бир неча дзюдочилар ва мураббийлар томонидан тартиб-интизом қоидаларининг бузилганлик ҳолати кўриб чиқилди. Яъни, дзюдочиларимизнинг бир неча нафари оқибатини ўйламаган ҳолда тўй курашида иштирок этишган. Уларга мураббийлар ҳам ҳамроҳлик қилган. 

Халқаро дзюдо федерацияси (IJF) бу каби ҳолатларни кескин қоралайди. Дзюдодан бошқа кураш турларидаги мусобақаларда иштирок этиш қатъиян маън этилади. Бу ҳолат IJF спорт ва ташкилий қоидаларининг 4.1-моддасига кўра жазога тортилади. Яъни, жаҳон рейтингида таснифланган спортчи халқаро дзюдо федерациясидан рухсат олинмагунга қадар дзюдодан бошқа ҳар қандай кураш спорт туридан халқаро ва бошқа мусобақаларда иштирок эта олмайди. 

Комиссия келгусида юқорида келтирилган ҳолатлар такрорланмаслиги, рухсат этилмаган тадбирларда қатнашилмаслигининг олдини олиш мақсадида бир неча дзюдочи ва тренерларга интизомий чоралар қўлланилишини маълум қилaди. Дзюдочи бошқа спорт туридаги мусобақаларда кутилмаган жароҳат орттириб олиши ва бунинг натижасида терма жамоани қийин аҳволда қолдириши мумкин. Ҳеч ким жароҳатлардан ҳимояланмаган.

Йиғилишда кўрилган масала федерациянинг вилоятлардаги бўлимларига ҳам жўнатилди. Ҳар бир ҳудудий бўлим ўз спортчи ва тренерлари билан ушбу масаланинг оқибатлари юзасидан тушунтириш ишларини олиб боради.