Mutua Madrid Open турнирининг чемпиони аниқланди

Ҳал қилувчи финал учрашувида дунёнинг биринчи ҳамда иккинчи рақамли теннис маликалари - польшалик Ига Свёнтек ва беларуслик Арина Соболенко ўзаро тўқнаш келишди. Ўтган йилги финалда ҳам бу икки теннисчи бош соврин учун кортга чиқишган ва ўшанда Соболенко ғалаба қозониб, бош соврин соҳибига айланганди.

Бу сафар Ига ўша мағлубият учун реванш олди. Драматик руҳда кечган финал баҳсида Свёнтек матчболдан чиқиб кетди ва якунда иродали ғалабага эришди - 7/5, 4/6, 7/6(7). Ҳал қилувчи учинчи сетни 5/6 ҳисобида бой бераётган Свёнтек иккита матчболдан чиқиб кетишга муваффақ бўлди. 

Учрашув статистикаси:

Ига Свёнтек - 2 та эйс, 4 та қўшхато, 5 та брейк

Арина Соболенко - 4 та эйс, 4 та қўшхато, 5 та брейк

Польшалик теннисчи ўзаро учрашувларда олдинда бормоқда - 7:3. Свёнтек фаолиятидаги 20-совринни қўлга киритди. WTA 1000 тоифасидаги бош совринлари эса 9 тага етди. Ига 2012 йилдан кейинги шунча совринга эга чиққан энг ёш теннисчига айланди. Бундан аввалги рекорд, яъни 20 та совринга эга бўлиш Каролин Возняцкига тегишли эди.

Mutua Madrid Open турниридаги муваффақиятли иштирок Ига Свёнтекка 1000 рейтинг очкоси ҳамда 963,225 евро мукофот пули келтирди.