Музаффар дзюдочиларимиз тантанали кутиб олинди ФОТОРЕПОРТАЖ

Ярим тун бўлишига қарамай, Ислом Каримов номидаги Тошкент халқаро аэропортида ўтган ҳафта қаҳрамонларини кутиб олиш учун Ўзбекистон Жисмоний тарбия ва спорт вазирлиги, Миллий олимпия қўмитаси, Ўзбекистон дзюдо федерацияси мутасаддилари, дзюдочиларимизнинг оила аъзолари, ёш дзюдочилар, кенг спорт жамоатчилиги ҳамда оммавий ахборот воситалари ходимлари ҳозир бўлишди.   

Эслатиб ўтамиз, Тель-Авив мусобақасида дунёнинг 60 давлатидан жами 418 нафар дзюдочи турнир медаллари ҳамда Токио Олимпиадаси йўлидаги муҳим рейтинг очколари учун татамига чиқди. Улар қаторида Ўзбекистон терма жамоасининг 11 нафар аъзоси ҳам ўз имконияти ва маҳоратини синовдан ўтказди. Дзюдочиларимиз Исроил турнирида 1 та олтин, 2 та бронза медали билан якунда умумжамоа ҳисобида 60 давлат орасида 8-ўринни банд этди. Шарофиддин Болтабоев олтин медаль ва 1000 рейтинг очкосига эга бўлди. -60 кг вазн тоифасидаги беллашувларда юртимиз шарафини ҳимоя қилган Сардор Нуриллаев ва Муҳриддин Тиловов эса бронза медали ҳамда 500 рейтинг очкосини қўлга киритди. 

Энди бор эътибор 5-7 март кунлари пойтахтимиздаги муҳташам "Ҳумо" арена саройида ўтказилувчи Тошкент "Катта Дубулға" турнирига тайёргарликка қаратилади. Бўлажак мусобақада Ўзбекистон терма жамоаси ҳар бир вазн тоифасида 4 нафардан дзюдочиси билан иштирок этади.