Музаффар спортчиларимиз тантанали равишда кутиб олинди ФОТОРЕПОРТАЖ

Илк бор ташкил этилган Ҳамдўстлик ўйинларида тўққиз давлатдан бир ярим мингдан зиёд спортчилар медаллар учун баҳс олиб боришди. Ушбу мусобақада ўзбекистонлик спортчилар 23 та олтин, 32 та кумуш, 36 та бронза, жами 91 та медаль қўлга киритиб, умумжамоа ҳисобида Россиядан сўнг иккинчи ўринни эгаллашди. 

Кеча оқшом МДҲ ўйинларида муваффақиятли тарзда қатнашган спортчиларимиз юртимизга қайтиб келишди. Музаффар спортчиларимиз Ислом Каримов номидаги Тошкент халқаро аэропортида тантанали равишда кутиб олинди.

Тадбирда Ўзбекистон Республикаси Бош вазири ўринбосарлари Беҳзод Мусаев, Азиз Абдуҳакимов (Туризм ва спорт вазири), Ўзбекистон халқ артисти Теша Мўминов иштирок этди. Ўзбекистон ҳукумати ушбу мусобақада совриндор бўлган спортчиларни пул мукофотини билан тақдирлади.

Унга кўра спортчиларимиз қуйидагича тақдирланишди:

Олтин медаль - 25 миллион сўм

Кумуш медаль - 15 миллион сўм

Бронза медаль - 10 миллион сўм

Мураббийлар - 12 500 000 сўм

Эслатиб ўтамиз, МДҲ ўйинларида дзюдо бўйича терма жамоамиз яккалик баҳсларида 4 та олтин, 2 та кумуш, 6 та бронза, жами 12 та медаль билан умумжамоа ҳисобида мезбонлардан сўнг иккинчи ўринни эгаллашди. Жамоавий баҳсларда дзюдочиларимизга тенг келувчи рақиб топилмади. Россия (5:2) ва Озарбайжон (5:3) терма жамоаларини мағлуб этган полвонларимиз МДҲ ўйинлари чемпиони бўлишди.