27 апр 16:10
Янгиликлар

Баскетбол

NBA. Чорак финалга йўл олган иккинчи жамоанинг номи маълум

Теглар : NBA

Майами шаҳридаги (АҚШ) «FTX Arena»да NBA плей-офф cерияси 1/8 финал босқичининг «Майами Хит» ва «Атланта Хокс» ўртасидаги бешинчи ўйин бўлиб ўтди.

Учрашув мезбонларнинг 97:94 ҳисобидаги ғалабаси билан якунланди ва бунинг эвазига «Майами Хит» серияда 4:1 ҳисобида ғалаба қозониб, NBA плей-оффининг кейинги босқичига йўл олди.

«Атланта» таркибида Деандре Хантер учрашувнинг энг сермаҳсул ўйинчиси бўлди, у 35 очко, 11 рибанд ва 2 самарали узатмани амалга оширди. «Майами»нинг энг яхши ўйинчиси Виктор Оладипо 23 очко, 1 рибанд ва 3 ассистентликни қайд этган бўлса, жамоадоши Эдрис Адебайо 20 очко, 11 рибанд ва 4 самарали узатма билан дабл-даблга эришди.

Шу тариқа, «Майами Хит» Шарқий конференция ярим финалига чиққан иккинчи NBA клубига айланди. Бунгача «Бостон Селтикс» «Бруклин Нетс»ни тўртта ўйинда мағлуб этганди. «Майами» «Филадельфия Сиксерс» ва «Торонто Рэпторс» (3-2) ўртасидаги сериянинг ғолиби билан тўқнаш келади.