"Номзодлар турнири". Каруанани мағлуб этган Синдаров 4-турнинг энг яхши шахматчиси!

Хабар берганимиздек, кеча мусобақанинг 4-турида амалдаги Жаҳон Кубоги ғолиби Жавоҳир Синдаров учинчи ғалабасини тантана қилганди. Ҳамюртимиз оқ доналарда асосий рақиби, 4-турга қадар ўзи сингари 2,5 очкога эга бўлиб турган, дунёнинг амалдаги учинчи рақамли шахматчиси америкалик Фабиано Каруанани мағлуб этишнинг уддасидан чиқди. Ушбу ғалабадан сўнг Жавоҳир 4 имкониятдан 3,5 очко тўплаб, турнир жадвалида якка пешқадам бўлиб олди. Каруана 2,5 очко билан 2-ўринни сақлаб қолди. 

Тўртинчи турда Аниш Гири ҳам ғалабага эришди. Нидерландиялик шахматчи қора доналарда ўйнаганига қарамай, FIDE байроғи остидаги россиялик Андрей Есипенкони таслим эта олди. Қолган икки партияда кучлар тенг келди. Рамешбабу Праггнанандҳа, Маттиас Блубаум ва Аниш Гири 2 очко билан кучли бешликни якунлаб турибди. 

Эътиборга молик жиҳати шундаки, Жавоҳир Синдаров 3-турда бўлгани сингари 4-турнинг ҳам энг яхши шахматчиси деб топилди. Бугун турнирда дам олиш куни сифатида эълон қилинган. Эртага 5-турда Жавоҳир Синдаров қора доналарда яна бир америкалик гроссмейстер Ҳикару Накамурага қарши баҳс олиб боради. 

Маълумот учун, Синдаров Жаҳон тожи учун ўйнаш имкониятини берадиган турнирда иштирок этаётган биринчи ўзбек шахматчиси ҳисобланади. Ўн тўрт турдан иборат мазкур турнир ғолиби жаҳон тожи учун ҳиндистонлик Гукеш Доммаражуга қарши дона суради.