Олти йил UFC чемпиони бўлган жангчи фаолиятини якунлашини эълон қилди

Жозе Альдо ўз вазн тоифасида дунёнинг энг яхши жангчиларидан бири ҳисобланади.

“Фаолиятимни Бразилияда якунлашни истайман. Ватанимда яна учта жанг ўтказиб, кейин фаолиятимни тугатаман. Февраль ойида Форталезеда Мойканога қарши октагонга чиқаман. Майда UFC 237 турнири доирасида жан ўтказишни режалаштиряпман. 

Йилнинг иккинчи ярмида UFC Бразилияда яна бир турнир ташкил қилишни мўлжал қилган. Айнан мана шу турнирда фаолиятимдаги сўнгги жангимни ўтказаман. Мени энди чемпионлик жанги қизиқтирмайди. Оиламга вақт ажратадиган фурсат етиб келди”, - деди Альдо.

Маълумот учун, Жозе Альдо 27та жангда ғалаба қозониб, 4та баҳсда мағлубият аламини тотиб кўрган. 2010-2015 йиллар оралиғида ярим енгил вазн тоифасида UFC чемпионлик камарини ўзида сақлаб турган. Конор Макгрегорга нокаут билан мағлуб бўлгач, собиқ чемпионга айланган.