Осиё чемпионати. Сарварбек Зафаржонов терма жамоамизга иккита бронза олиб келди

Куннинг охирги гуруҳида супачага -81 кг вазнли спортчилар кўтарилишди. 

Ушбу вазнда юртимиз шарафини Сарварбек Зафаржонов ва Ҳакимжон Шамшиддинов ҳимоя қилди.

Даст кўтариш машқи биринчи уринишда 143 кг тошни ўзига бўйсунтирган Шамсиддинов, иккинчи уринишда 147, учинчисида - 150 кг штангани кўтара олди ва ўз олдига қўйилган вазифани аъло даражада уддалади.  

Сарварбек Зафаржонов эса аввалига 161, кейин 166 кг оғирликни ўзига бўйсундирган бўлса, учинчи уринишда (170 кг) бироз омади чопмади. 

Медаллар учун курашда унга рақиблик қилган қозоғистонлик атлет Адолат ўғли Нургисса иккинчи уринишда 169 кгни кўтарди, учинчи чиқишида эса 172 кг тошни жиловлай олмади. 

Силтаб кўтариш машқи ҳам анча қизиқ кечди. Олтин медаль ва совринли ўринлар учун амалда 4 нафар атлет кураш олиб борди. Ва биз учун муҳими Сарварбек Зафаржонов учинчи уринишдан бўлсада, 202 кг тошни ўзига бўйсундирди. Айнан шу кўрсаткич орқали атлетимиз икки кураш бўйича ҳам терма жамоамизга бронза медалини тақдим этди. 

Даст кўтаришда биринчи бўлган қозоғистонлик Нургисса, силтаб кўтаришда учинчи ўринни эгаллади ва икки кураш натижаси бўйича ҳам кумуш медалга сазовор бўлди. 

Силтаб кўтаришда биринчи бўла олмаган бўлсада, Рустами Киануш (силтаб кўтаришда иккинчи) икки курашда олтинни бегона қилмади. 

Осиё чемпионати.
Эркаклар, -89 кг.
1. Рустами Киануш - 373 (167 + 206) кг;
2. Нургисса Адолат ўғли - 372 (169 + 203);
3. Сарварбек Зафаржонов - 368 (166 + 202) кг.