Осиё чемпионатида ўзбек спортчилари учун аталган кун

Ушбу мусобақаларда ўзбекистонлик спортчилар ҳам иштирок этишмоқда. Терма жамоамиз шарафини ёшлар ўртасидаги баҳсларда 11, катталар ўртасидаги беллашувларда эса 19 нафар спортчи ҳимоя қилмоқда.

Мусобақанинг бугунги куни спортчиларимиз учун омадли кечмоқда. Ёшлар ўртасидаги баҳсларда JM2 йўналишида Давржон Давронов/Евгенй Агафонов тандеми терма жамоамиз учун турнирдаги илк олтин медални тақдим этди. Маълумот учун, айнан ушбу спортчилар Буэнос-Айресда бўлиб ўтадиган ўсмирлар Олимпия ўйинларида юртимиз шарафини ҳимоя қиладилар.

Катталар ўртасида ўтказилаётган баҳсларда М2x йўналишида Шаҳбоз Абдужабборов ҳамда Абдулло Муҳаммадиев жуфтлиги олтин, Бекзод Холмирзаев ва Абубакир Узоқбоев тандеми бронза медалига сазовор бўлишди. Ушбу йўналишда икки ўзбек экипажи совриндорлар қаторидан жой олгани диққатга сазовор. Баҳслар Олимпия йўналиши, яъни 2000 метр масофа бўйича ўтказилмоқда.

М1Х йўналишида Шахбоз Холмурзаев терма жамоамиз ҳисобига навбатдаги кумуш медални қўшиб қўйди. M2 баҳсларида Алишер Турдиев ва Сардор Тўлқинхўжаевдан ташкил топган жуфтлик мусобақанинг олтин медалини қўлга киритди.

LM4 йўналишидаги беллашувларда Зафар Усмонов, Шоҳжаҳон Нажмиев, Исламбек Мамбетназаров, Шехроз Ҳакимовлардан ташкил топган квартет терма жамоамиз ҳисобига навбатдаги олтин медални қўшиб қўйди.

Демак, бугунги кун якунларига кўра, терма жамоамиз аъзолари 4та олтин, 1та кумуш ва 1та бронза медалларини қўлга киритишди. Мусобақа эртага якунига етади.