Осиё ўйинлари. Бугун биттадан олтин ва бронза медалини қўлга киритдик

Ўз тарихида бешинчи бор ўтказилаётган қитъа ўйинларида Ўзбекистон спорт делегацияси ҳам бир нечта спорт турларида медаллар учун баҳсларга киришган. Бугун ўтказилган баҳслардан сўнг терма жамоамиз ҳисобидаги медаллар сони 5тага етди. Шулардан 3та олтин, биттаси кумуш ҳамда бронза медалларидир.

Бугун самбо бўйича ўтказилган мусобақада спортчиларимиз биттадан олтин ва бронза медалини терма жамоамизга тақдим этишди. -90 кг вазн тоифасида гиламга чиққан Икромжон Йўлдошев барча рақибларини мағлубиятга учратиб, шохсупанинг энг юқори поғонасига кўтарилди.

У финал баҳсида қозоғистонлик Алибек Зекеновдан устун келди. Финалгача бўлган баҳсларда эса ливанлик Кевин Николаос, таиландлик Сонрам Женгхор, эронлик Ираж Амирханидан устун эканлигини амалда исботлади.

Самбонинг аёллар ўртасидаги -56 кг вазн тоифасидаги баҳсларида иштирок этган Маликабону Мирзаева бронза медали билан тақдирланди. У ярим финалда мезбонлар вакиласига ютқазиб қўйди. Бронза медали учун кечган баҳсда эса таиландлик Сасипилай Чайсангни таслим этди.