Осиё ўйинлари. Медаллар жамғариш бўйича 10-ўриндамиз!

Ўз тарихида бешинчи бор ўтказилаётган қитъа ўйинларида Ўзбекистон спорт делегацияси ҳам бир нечта спорт турларида медаллар учун баҳсларга киришган. Ҳозирча терма жамоамиз 2та олтин ва битта кумуш медал билан умумжамоа ҳисобида 10-ўринни эгаллаб турибди.

20та олтин, 12та кумуш, 16та бронза, жами 48та медал жамғарган Таиланд терма жамоаси биринчи ўринни банд этган. 19та олтин, 19та кумуш, 26та бронза медалини қўлга киритиб улгурган мезбонлар – Вьетнам терма жамоаси иккинчи ўриндан жой олган. Кучли учликка 6та олтин, 8та кумуш, 12та бронза медалини жамғарган Хитой терма жамоаси якун ясаган.

Кучли ўнталикдан Эрон, Иордания, БАА, Мўғулистон, Қозоғистон ҳамда Филиппин терма жамоалари ўрин олишган. Жами 21та мамлакат терма жамоалари ҳисобида камида биттадан олтин медал бор. 33та терма жамоа эса камида битта бронза медалини қўлга киритган.

Эслатиб ўтамиз, терма жамоамизга барча медалларни курашчиларимиз тақдим этишган. -66 кг вазн тоифасида Миржон Тўхтаев, -73 кг вазнда Суҳроб Худойбердиев Осиё ўйинлари ғолибига айланган бўлса, -81 кг вазн тоифасидаги вакилимиз Муҳаммадали Шамсиддинов кумуш медал билан тақдирланди.