Осиё ўйинлари. Медаллар жамғариш бўйича ҳамон 10-ўриндамиз!

Ўз тарихида бешинчи бор ўтказилаётган қитъа ўйинларида Ўзбекистон спорт делегацияси ҳам бир нечта спорт турларида медаллар учун баҳсларга киришган. Ҳозирча терма жамоамиз 2та олтин ва битта кумуш медал билан умумжамоа ҳисобида 10-ўринни эгаллаб турибди.

28та олтин, 23та кумуш, 28та бронза, жами 79та медал жамғарган Вьетнам терма жамоаси Таиландни ортда қолдириб, биринчи ўринга кўтарилиб олди. Таиланд терма жамоаси ҳисобида 24та олтин, 14та кумуш, 20та бронза медали бор. Кучли учликка 8та олтин, 12та кумуш, 14та бронза медалини жамғарган Хитой терма жамоаси якун ясаган.

Кучли ўнталикдан Эрон, Иордания, БАА, Мўғулистон, Қозоғистон ҳамда Филиппин терма жамоалари ўрин олишган. Жами 22та мамлакат терма жамоалари ҳисобида камида биттадан олтин медал бор. 33та терма жамоа эса камида битта бронза медалини қўлга киритган.

Эслатиб ўтамиз, терма жамоамизга барча медалларни курашчиларимиз тақдим этишган. -66 кг вазн тоифасида Миржон Тўхтаев, -73 кг вазнда Суҳроб Худойбердиев Осиё ўйинлари ғолибига айланган бўлса, -81 кг вазн тоифасидаги вакилимиз Муҳаммадали Шамсиддинов кумуш медал билан тақдирланганди.