Осиё ўйинлари. Терма жамоамиз 5та медал билан 15-ўринни эгаллади

Ўз тарихида бешинчи бор ўтказилган қитъа ўйинларида Ўзбекистон спорт делегацияси ҳам иштирок этди. Якунда терма жамоамиз 3та олтин, битта кумуш ва битта бронза медали билан 15-ўринни эгаллади. 

Осиё ўйинларида терма жамоамизга олтин медалларни самбо баҳсларида Икромжон Йўлдошев, кураш мусбақасида Миржон Тўхтаев ва Суҳроб Худойбердиевлар келтиришди.

Яна бир курашчимиз Муҳаммадали Шамсиддинов эса кумуш медал билан тақдирланди. Аёллар ўртасидаги самбо баҳсларида иштирок этган Маликабону Мирзаева эса бронза медалига сазовор бўлди.

52та олтин, 44та кумуш, 43та бронза, жами 139та медал жамғарган Вьетнам терма жамоаси умумжамоа ҳисобида катта фарқ билан биринчи ўринни эгаллади. Иккинчи ўриндан жой олган Таиланд терма жамоаси Осиё ўйинларида 36та олтин, 24та кумуш, 30та бронза, жами 90та медални қўлга киритди.

Кучли учликка 12та олтин, 18та кумуш, 19та бронза медалини жамғарган Хитой терма жамоаси якун ясади. Кучли ўнталикдан Эрон, Иордания, БАА, Мўғулистон, Камбоджа, Қатар ва Малайзия терма жамоалари ўрин олишди.