Осиё регби иттифоқи Президенти Ага Ҳусайн Миллий олимпия қўмитасида меҳмон бўлди

Меҳмонни Қўмита Бош котиби Жасур Матчанов кутиб олди. Учрашувда регби спорт турининг Ўзбекистондаги тараққиёти, ҳамкорликни янада мустаҳкамлаш, федерация учун база, ташкилий ва бошқа масалалар ҳусусида сўз борди.

"Қабул учун миннатдорчилик билдираман. Ўзбекистон регби ривожланаётган мамлакатлар қаторига киради. Ишонаманки, яқин йиллар ичида юртингизда регби спорт тури янада оммавийлашади", - деди Ага Ҳусайн.

Бош котиб Жасур Матчанов эса бошқа жамоавий спорт турлари қаторида регбини ҳам ривожлантириш учун алоҳида дастур ишлаб чиқилаётгани ҳақида маълум қилди.

"Ўзбекистонда регби турли минтақаларда ривожланмоқда. Тан оламиз, бизда база билан боғлиқ муаммо бор. Аммо, янги циклдан бошлаб бу борадаги муаммолар бартараф этилади. Мамлакатимизда жамоавий спорт турларини ривожлантириш учун алоҳида дастурлар ишлаб чиқилмоқда, шу жумладан регби учун ҳам. Бу борада режаларимиз катта. Биз Ўзбекистон регби федерацияси билан биргаликда спортнинг ушбу турини оммавийлаштирамиз. Регби учун футбол стадионларини ажратишни режалаштириб қўйганмиз", - деди Жасур Матчанов.

Ундан ташқари Тошкентда Марказий Осиё регби маркази очилиши ва бу ғоя Осиё регби иттифоқи томонидан қўллаб-қувватланиши маълум қилинди. Учрашув якунида Жасур Матчанов анъанага кўра мартабали меҳмонга Миллий олимпия қўмитаси номидан эсдалик совғаларини тақдим этди.