Осиё хоккей федерацияси томонидан махсус мукофотга лойиқ топилдик

Ўзбекистон Чим устида хоккей федерацияси раиси Баҳодир Аҳмедовга мамлакатда спортнинг ушбу спорт турини ривожлантиришда амалга оширилаётган ижобий ишлари учун ОХФнинг махсус мукофоти топширилди. Шунингдек, у илк бор қитъа федерациясининг ижроия қўмитаси аъзолигига сайланди.

Айни пайтда Япониянинг Гифу шаҳрида Осиё хоккей федерациясининг Конгресси бўлиб ўтмоқда. Унда қитъамизнинг федерацияга аъзо барча мамлакатлари вакиллари, жумладан, Ўзбекистон чим устида хоккей федерацияси раиси Баҳодир Аҳмедов ҳам иштирок этмоқда. Кеча бошланган Конгресс кун тартибидаги масалалардан ташқари ташкилий масалалар ҳам кўрилмоқда. Шулардан бири, Осиё хоккей федерацияси Ўзбекистонда чим устида хоккей спорт турини ривожлантиришда амалга оширилаётган улкан кўламли ижобий ишлари учун федерациямиз раҳбарини махсус диплом ва медаль билан тақдирлагани бўлди. Энг муҳими, Ўзбек Чим устида хоккей спорт тури бўйича илк бор вакилимиз – Баҳодир Аҳмедов Осиё хоккей федерацияси ижроия қўмитасининг аъзолигига қабул қилинди.

Федерациямиз раҳбари шунингдек, мамлакатимиз чим хоккейи манфаати йўлида яна бир қатор келишувларни ҳам амалга оширмоқда. Ёдингизда бўлса, ўтган йилнинг кузида федерация раҳбари ҳамда бош котиби Ҳиндистоннинг Деҳли шаҳрида Чим устида хоккей халқаро федерациясининг 46-Конгрессида иштирок этиб, шу соҳанинг Осиё ва Жаҳон бўйича мутасадди раҳбарлари билан учрашган, амалий ишлар бўйича мунозаралар олиб борган эди. 

Бунинг натижаси ўлароқ мамлакатимизда чим устида хоккей спорт турини янада ривожлантириш мақсадида Ўзбекистон чим устида хоккей федерациясига 400 минг АҚШ долларлик халқаро талабларга жавоб берувчи махсус майдон қопламасини қуриб бериш, спортнинг бу турига оид спорт анжомларини ажратиш, пойтахтимизда келаси йили чим устида хоккей бўйича Халқаро турнир ташкил этиш каби масалалар ижобий акс топганди. Б.Аҳмедов Конгресс баҳонасида манашу келишувни расмийлаштиришга, яъни шартномага томонларнинг имзо чекишига муваффақ бўлди.